ភ្នំពេញ៖ អភិបាលរាជធានីភ្នំពេញលោក ឃួង ស្រេង នៅថ្ងៃនេះបានដឹកនាំកម្លាំងចុះពិនិត្យ និងចុះអន្តរាគមន៍ជួយទប់ទំនប់សណ្ដស្ទឹងព្រែកត្នោតក្នុងភូមិសាស្ត្រខណ្ឌដង្កោ ដែលស្ថានភាពទឹកកំពុងបន្តហក់ឡើងខ្លាំង។ នេះបើតាមការផ្សព្វផ្សាយរបស់សាលារាជធានីភ្នំពេញ។
ទឹកស្ទឹងព្រែកត្នោតបានហក់ឡើងជាគំហុកនៅក្នុងរយៈពេលប៉ុន្មានថ្ងៃចុងក្រោយនេះ ខណៈរដ្ឋបាលខណ្ឌដង្កោរក៏បានចេញសេចក្ដីជូនដំណឹងត្រៀមបង្កាជំនន់ស្ទឹងព្រែកត្នោតដែលអាចកើតឡើងជាយថាហេតុផងដែរ។
ក្នុងសេចក្ដីជូនដំណឹងចុះថ្ងៃទី២៥ ខែតុលា នេះ បានជូនដំណឹងដល់ពលរដ្ឋដែលរស់នៅជាប់សណ្តស្ទឹងព្រែកត្នោតដែលមានសង្កាត់ព្រៃស សង្កាត់ព្រៃវែង សង្កាត់ក្រាំងពង្រ សង្កាត់ស្ពានថ្ម សង្កាត់ទៀន សង្កាត់សាក់សំពៅ សង្កាត់ជើងឯក សង្កាត់ព្រែកកំពឹស និងសង្កាត់គងនយ ឱ្យប្រុងប្រយ័ត្នចំពោះការជន់លិចពីជំនន់នៃដងស្ទឹងព្រែកត្នោតដែលបានឡើងដល់កម្រិតប្រុងប្រយ័ត្នខ្ពស់ហើយ។
ក្នុងសេចក្ដីជូនដំណឹងនោះបានសរសេរថា៖ «ដូច្នោះដើម្បីជៀសវាងនូវហានិភ័យដែលបង្កឱ្យខួចខាតសម្បត្តិ និងអាយុជីវិត សូមបងប្អូនប្រជាពលរដ្ឋដែលរស់នៅតាមសណ្ដស្ទឹងព្រែកត្នោត មេតាត្រៀមសម្ភារ និងបន្តតាមដានស្ថានភាពទឹកជាប្រចាំជៀសវាងការបាត់បង់សម្ភារ និងអាយុជីវិត» ។
អ្នកនាំពាក្យក្រសួងធនធានទឹកនិងឧតុនិយមលោក ចាន់ យុត្ថា មានប្រសាសន៍ប្រាប់ EAC News ថាការកើនឡើងទឹកក្នុងស្ទឹងព្រែកត្នោតនេះបណ្ដាលមកពីភ្លៀងក្នុងខេត្តកំពង់ស្ពឺនៅក្នុងរយៈពេល៣ថ្ងៃចុងក្រោយនេះឡើងជាគំហុក។ លោកបន្ថែមថា ជាង១ខែមកហើយដែលក្រសួងពិនិត្យ និងមានវិធានការជាបន្តបន្ទាប់ក្នុងការទប់ស្កាត់កុំឱ្យជំនន់នេះកើនឡើងធ្វើឱ្យជន់លិចផ្ទះពលរដ្ឋផងដែរ។
លោកមានប្រសាសន៍ថា៖ «យើងព្យាយាមទប់ទល់ បើទោះបីជាមានហានិភ័យយ៉ាងមិចគឺយើងទប់ទល់ឱ្យខានតែបាន បើមិនបានទេយើងធ្វើយ៉ាងមិចត្រូវកាត់បន្ថយកម្រិតនៃការប៉ះពាល់ឱ្យបានទាបបំផុត» ។
គួររំលឹកផងដែរថា ជំនន់ស្ទឹងព្រែកត្នោតក្នុងខណ្ឌដង្កោកាលពីឆ្នាំ២០២០ បានបង្កផលប៉ះពាល់ដល់ពលរដ្ឋប្រមាណ៥០០០គ្រួសារ ក្នុងនោះជាង៣០០០គ្រួសារត្រូវបានជម្លៀសទៅទីសុវត្ថិភាព៕